ਰਾਹੁਲ ਗਾਂਧੀ ਦਾ ਚੋਣ ਕਮਿਸ਼ਨ ’ਤੇ ਭਾਜਪਾ ਨਾਲ ਮਿਲੀਭੁਗਤ ਦਾ ਦੋਸ਼...

ਲੋਕ ਸਭਾ ਵਿਰੋਧੀ ਧਿਰ ਦੇ ਨੇਤਾ ਅਤੇ ਕਾਂਗਰਸ ਸੰਸਦ ਮੈਂਬਰ ਰਾਹੁਲ ਗਾਂਧੀ ਨੇ ਚੋਣ ਕਮਿਸ਼ਨ ’ਤੇ ਭਾਜਪਾ ਨਾਲ ਮਿਲੀਭੁਗਤ ਦੇ ਗੰਭੀਰ ਦੋਸ਼ ਲਗਾਏ। ਉਨ੍ਹਾਂ ਕਿਹਾ ਕਿ ਮਹਾਰਾਸ਼ਟਰ ਵਿੱਚ ਲੋਕ ਸਭਾ ਚੋਣਾਂ ਦੌਰਾਨ ਇੰਡੀਆ ਗੱਠਜੋੜ ਨੂੰ ਮਿਲੀਆਂ ਵੋਟਾਂ ਵਿਧਾਨ ਸਭਾ ਵਿੱਚ ਵੀ ਬਰਕਰਾਰ ਰਹੀਆਂ, ਪਰ ਅਚਾਨਕ ਇੱਕ ਕਰੋੜ ਨਵੇਂ ਵੋਟਰਾਂ ਦੀ ਐਂਟਰੀ ਨਾਲ ਭਾਜਪਾ ਨੂੰ ਫ਼ਾਇਦਾ ਮਿਲਿਆ। ਰਾਹੁਲ ਦੇ ਅਨੁਸਾਰ, ਜਿੱਥੇ ਵੀ ਇਹ ਨਵੇਂ ਵੋਟਰ ਬਣਾਏ ਗਏ, ਉੱਥੇ ਭਾਜਪਾ ਨੇ ਜਿੱਤ ਦਰਜ ਕੀਤੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਚੋਣ ਕਮਿਸ਼ਨ ਨੇ ਨਾ ਤਾਂ ਨਵੇਂ ਵੋਟਰਾਂ ਬਾਰੇ ਕੋਈ ਸਪਸ਼ਟੀਕਰਨ ਦਿੱਤਾ ਅਤੇ ਨਾ ਹੀ ਵੋਟਰ ਸੂਚੀ ਜਾਂ ਸੀਸੀਟੀਵੀ ਰਿਕਾਰਡਿੰਗ ਉਪਲਬਧ ਕਰਵਾਈ। ਰਾਹੁਲ ਗਾਂਧੀ ਨੇ ਦੋਸ਼ ਲਗਾਇਆ ਕਿ "ਚੋਣ ਕਮਿਸ਼ਨ ਅਤੇ ਭਾਜਪਾ ਨੇ ਮਿਲ ਕੇ ਬੰਗਲੁਰੂ ਸੈਂਟਰਲ ਵਿੱਚ ਧੋਖਾਧੜੀ ਕੀਤੀ ਹੈ"। ਨਾਲ ਹੀ ਉਨ੍ਹਾਂ ਨੇ ਚੋਣ ਕਮਿਸ਼ਨ ’ਤੇ ਪੱਖਪਾਤ ਦਾ ਦੋਸ਼ ਲਾਉਂਦਿਆਂ ਕਿਹਾ ਕਿ “ਮੇਰੇ ਤੋਂ ਤਾਂ ਹਲਫ਼ਨਾਮਾ ਮੰਗਿਆ ਜਾਂਦਾ ਹੈ, ਪਰ ਜਦੋਂ ਅਨੁਰਾਗ ਠਾਕੁਰ ਉਹੀ ਗੱਲ ਕਹਿੰਦਾ ਹੈ ਤਾਂ ਉਸ ਤੋਂ ਕੁਝ ਨਹੀਂ ਪੁੱਛਿਆ ਜਾਂਦਾ।”